ផ្សារមូលបត្រកម្ពុជា បន្តប្រឹងប្រែងបញ្ជ្រាបចំណេះដឹងដល់សាស្ត្រាចារ្យតាមសាកលវិទ្យាល័យ ដើម្បីអភិវឌ្ឍទីផ្សារភាគហ៊ុន ឲ្យកាន់តែមានសកម្មភាពជួញដូរកាន់តែច្រើន

(ភ្នំពេញ)៖ ក្រុមហ៊ុនផ្សារមូលបត្រកម្ពុជា (CSX) បានបន្តប្រឹងប្រែងបញ្ជ្រាបចំណេះដឹងដល់សាស្ត្រាចារ្យនានា ដើម្បីអភិវឌ្ឍផ្សារមូលបត្រកម្ពុជា ឬហៅដោយសារមញ្ញថា ទីផ្សារហ៊ុន ឲ្យមានសកម្មភាពជួញដូរកាន់តែច្រើន។

ជាក់ស្តែងនៅថ្ងៃទី២៩ ខែសីហា ឆ្នាំ២០១៨ CSX បានរៀបចំសិក្ខាសាលាពិសេសសម្រាប់សាស្ត្រាចារ្យស្តីពី «ទីផ្សារមូលបត្រកម្ពុជា» នៅអគារ CSX ដោយមានការចូលរួមជាអធិបតីពីសំណាក់ លោក HA Jong Weon អគ្គនាយករងនៃ CSX។ សិក្ខាសាលា​នេះ ត្រូវ​បានចូលរូមដោយសាស្ត្រាចារ្យចំនួន៤៤រូប ដែលអញ្ជើញមកពីសាកលវិទ្យាល័យចំនួន៨ នៅក្នុងរាជធានីភ្នំពេញ។

សិក្ខាសាលានេះត្រូវបានរៀបចំឡើង ក្នុងគោលបំណងលើកកម្ពស់ចំណេះដឹងក្នុងវិស័យមូលបត្រ និងបញ្ជ្រាបការយល់ដឹងនេះ ដល់​គ្រឹះស្ថានអប់រំនានា ជាពិសេសតាមសាកលវិទ្យាល័យ ដោយមានការធ្វើបទបង្ហាញពីវាគ្មិនចំនួនបីរូប រួមមាន៖ លោក ហោ ស៊ីម៉េត អគ្គនាយករង ​នៃក្រុមហ៊ុនមូលបត្រអេស៊ីលីដា ស៊ីឃ្យួរឹធី ភីអិលស៊ី, លោក ទៀង ស៊ីវណ្ណសក្តិ សមាការីហិរញ្ញវត្ថុសាជីវកម្ម (Associate in Corporate Finance) នៃក្រុមហ៊ុនមូលបត្រយាន់តា ស៊ីឃ្យួរឹធី (ខេមបូឌា) ភីអិលស៊ី, និងលោក ទ្រី តៃហ៊ី មន្ត្រីគ្រប់គ្រងនៃ CSX ផងដែរ។

ថ្លែងក្នុងពិធីនេះ លោកអគ្គនាយករងនៃ CSX បានឲ្យដឹងថា ផ្សារមូលបត្រកម្ពុជា កំពុងខិតខំប្រឹងប្រែងយ៉ាងខ្លាំង ដើម្បីទាក់ទាញក្រុមហ៊ុនបោះផ្សាយមូលបត្រ និងអ្នកវិនិយោគដែលមានសក្តានុពល ក្នុងគោលបំ​ណង​​អភិវឌ្ឍផ្សារមូលបត្រកម្ពុជា​ ឲ្យកាន់តែមានសកម្មភាពជួញដូរកាន់តែច្រើន។

លោក HA Jong Weon បានបន្ថែមថា កម្មវិធីនៅថ្ងៃនេះ នឹងចូលរួមចំណែកយ៉ាងសំខាន់ក្នុងការលើកកំពស់ការយល់ដឹង ពីវិស័យមូលបត្រទៅដល់សាស្រ្តាចារ្យទាំងអស់ ដែលមានវត្តមាននៅទីនេះ និងសង្ឃឹមយ៉ាងមុតមាំថា ចំណេះដឹងទាក់ទងនឹងវិស័យថ្មីមួយនេះ នឹងត្រូវបានផ្សព្វផ្សាយបន្ដទៅដល់សាធារណជន និងជាពិសេសនិស្សិតតាមសាកលវិទ្យាល័យនានាផងដែរ។

សូមជម្រាបថា ក្នុងសិក្ខាសាលានេះ សាស្ត្រាចារ្យជាច្រើនរូប បានមានចំណាប់អារម្មណ៍ចង់សាកល្បង ក្នុងការជួញដូរក្នុងទីផ្សារមូលបត្រ និងបានធ្វើការបើកគណនីជួញដូរ មូលបត្រភ្លាមៗ។ មុនកម្មវិធីនេះ ត្រូវបានបញ្ចប់ លោកអគ្គនាយករង ក៏បានចែកវិញ្ញាបនបត្រទៅដល់សិក្ខាកាម ដែលបានអញ្ជើញចូលរួមផងដែរ៕