នាយកប្រតិបត្តិ Facebook យល់ព្រមផ្តល់ភស្តុតាង នៅចំពោះមុខសភា​ហើយ

Credit: freshnews

(វ៉ាស៊ីនតោន)៖ ទីបំផុត ស្ថាបនិកក្រុមហ៊ុន Facebook លោក Mark Zuckerberg បានសម្រេចចិត្ត​ព្រមព្រៀងផ្តល់ភស្តុតាង នៅចំពោះមុខសភា, នេះបើយោងតាមសារព័ត៌មាន New York Post ចេញផ្សាយឲ្យដឹង នាយប់ថ្ងៃទី២៧ ខែមីនា ឆ្នាំ២០១៨នេះ។

នាយកប្រតិបត្តិក្រុមហ៊ុន Facebook វ័យ៣៣ឆ្នាំរូបនេះ បានមកធ្វើកិច្ចព្រមព្រៀងថា លោកនឹងមានភស្តុតាងបង្ហាញចំពោះមុខសភា នៅក្នុងបញ្ហា ដែលបានអូសបន្លាយពេលជាច្រើនសប្តាហ៍នេះ ហើយក្រុមហ៊ុន Facebook បច្ចុប្បន្ននេះ កំពុងរៀបចំគម្រោងយុទ្ធសាស្ត្រ សម្រាប់ការបង្ហាញភស្តុតាងរបស់លោក។
​
លោក Zuckerberg នៅព្រឹកថ្ងៃអង្គារនេះបានបដិសេធក្នុងការបង្ហាញខ្លួន នៅចំពោះមុខសភាចក្រភពអង់គ្លេស ក្នុងការឆ្លើយសំណួរស្តីពីការអនុវត្តភាពឯកជនរបស់ Facebook ដោយលោក បានបញ្ជាក់ថា បុគ្គលិកជាន់ខ្ពស់ដទៃទៀត​ អាចបញ្ជាក់ចម្លើយបានច្បាស់ជាង ចំពោះសំណួររបស់ពួកគេពាក់ព័ន្ធនឹងរឿងអាស្រូវនេះ។

ប្រធានព្រឹទ្ធសភា លោក Chuck Grassley បានអញ្ជើញជាផ្លូវការ លោក Zuckerberg ជាមួយនឹងនាយកប្រតិបត្តិ ក្រុមហ៊ុន Google លោក Sundar Pichai និងនាយកប្រតិបត្តិក្រុមហ៊ុន Twitter លោក Jaqck Dorsey ទៅកាន់សវនាការ ស្តីពីការបែកធ្លាយទិន្នន័យ​ឯកជន នៅថ្ងៃទី១០​ ខែមេសាខាងមុខ។
​
សវនាការ នឹងធ្វើឡើងនៅវិមានព្រឹទ្ធសភា Capitol Hill របស់សហរដ្ឋអាមេរិក នឹងក្លាយជាទីចាប់អារម្មណ៍មួយរបស់សាធារណជន ខណៈលោក Zuckerberg ​​ធ្វើការតស៊ូដើម្បីទប់ស្កាត់ ការបំផ្លិចបំផ្លាញ ស្តីពីការបែកធ្លាយថា ក្រុមហ៊ុន Facebook បានផ្តល់ទិន្នឯកជននៃអ្នកប្រើប្រាស់ ជាង៥០លាននាក់ ឲ្យទៅក្រុមហ៊ុនវិភាគ Cambridge Analytica ដែលជាក្រុមហ៊ុនមួយ មានទំនាក់ទំនងជាមួយនឹង យុទ្ធនាការរបស់លោកប្រធានាធិបតី Trump ៕