ដីកាកោះហៅទណ្ឌិត សម រង្ស៊ី រឿង​ប្រមាថ​ព្រះ​ចេស្តា​ព្រះ​មហាក្សត្រ​ នៅ​ថ្ងៃទី​១២ ខែកក្កដា ត្រូវបានសមត្ថកិច្ច យកទៅបិទនៅអតីតទីស្នាក់ការគណបក្សសង្គ្រោះជាតិ

(ភ្នំពេញ)៖ នៅព្រឹកថ្ងៃទី២២ ខែមិថុនា ឆ្នាំ២០១៨ មន្រ្តីនគរបាលសង្កាត់ចាក់អង្រែលើ ខណ្ឌមានជ័យ បានយកដីកាកោះហៅទណ្ឌិត សម រង្ស៊ី ឲ្យចូលទៅបំភ្លឺនៅថ្ងៃទី១២ ខែកក្កដា ពាក់ព័ន្ធការប្រមាថព្រះចេស្តាព្រះមហាក្សត្រ ទៅបិទនៅអតីតទីស្នាក់ការគណបក្សសង្គ្រោះជាតិ។

សូមបញ្ជាក់ថា កាលពីថ្ងៃទី២០ ខែមិថុនា ឆ្នាំ២០១៨ លោក ​សៀង​ សុខ​ ព្រះ​រាជ​អាជ្ញា​រង​អម​សាលាដំបូង​រាជធានី​ភ្នំពេញ​ បានកោះ​ហៅ​ជនសង្ស័យ​ សម​ រង្ស៊ី​ ចូល​បំភ្លឺ​នៅ​ព្រឹក​ថ្ងៃ​ទី​១២​ ខែ​កក្កដា​ ឆ្នាំ​២០១៨​ខាងមុខ​នេះ​ ពាក់ព័ន្ធ​ករណី​ប្រមាថ​ព្រះ​ចេស្តា​ ព្រះ​មហាក្សត្រ​។

កាលពីពេលថ្មីៗនេះ លោក​ អង្គ​ វង្ស​ វឌ្ឍនា​ រដ្ឋមន្ត្រីក្រសួង​យុត្តិធម៌ បានធ្វើអធិបញ្ជាឱ្យ​តំណាង អយ្យការអមសាលាដំបូង​រាជធានីភ្នំពេញ ចាត់ការតាមផ្លូវច្បាប់ចំពោះលោកសម រង្ស៊ីដែលប្រមាថ ព្រះមហាក្សត្រ រឿងព្រះរាជសារក្លែងក្លាយ។

វិធានការរបស់លោករដ្ឋមន្រ្តីក្រសួងយុត្តិធម៌ នាពេលនេះ បាន​ធ្វើ​ឡើងស្របពេលដែលមានការងើបទាមទារឱ្យតុលាការកម្ពុជា ចាត់វិធានការឱ្យបានម៉ឺងម៉ាត់ តាមច្បាប់ចំពោះទណ្ឌិត សម រង្ស៊ី មេចលនាសង្រ្គោះជាតិ ដែលបាន​ប្រមាថថា ព្រះរាជសារព្រះមហាក្សត្រ ជាទីសក្ការៈបំផុត ចុះថ្ងៃទី១៨ ខែឧសភា ឆ្នាំ២០១៨ ដែលអំពាវនាវឱ្យប្រជាពលរដ្ឋទៅបោះឆ្នោត នាចុងខែកក្កដាខាងមុខនោះគឺជាព្រះរាជ សារក្លែងក្លាយ និងគ្មានតម្លៃ ទោះបីជាព្រះបរមរាជវាំងចេញមុខប្រកាសថា ព្រះរាជសារនោះជាព្រះរាជសារពិតប្រាកដមិនក្លែងក្លាយក៏ដោយ​៕