បារាំង៖ មន្ត្រីជាន់ខ្ពស់ព្រឹទ្ធសភាមួយរូបរងការចោទប្រកាន់ពី «ទង្វើក្បត់ជាតិ» ដោយលួចស៊ើបការណ៍សម្ងាត់ឲ្យកូរ៉េខាងជើង!
(ប៉ារីស)៖ នៅទីបំផុតមន្ត្រីព្រឹទ្ធសភាបារាំងជាន់ខ្ពស់មួយរូប ត្រូវបានដាក់ឱ្យនៅក្រោមការស៊ើបអង្កេតជាផ្លូវការហើយ ពីបន្ទាប់ពីត្រូវដោយអាជ្ញាធរបានចោទថា បានធ្វើចារកម្មឱ្យកូរ៉េខាងជើង។ នេះបើតាមការចេញផ្សាយដោយសារព័ត៌មាន BBC នៅរសៀលថ្ងៃសុក្រ ទី៣០ ខែវិច្ឆិកា ឆ្នាំ២០១៨។
មន្ត្រីព្រឹទ្ធសភាបារាំងជាន់ខ្ពស់ម្នាក់មានឈ្មោះថា ប៊េណ័រ កេណឺដេ (Benoît Quennedey) ត្រូវគេសង្ស័យថា បានប្រព្រឹត្តអំពើក្បត់ជាតិ និងធ្វើចារកម្មឱ្យបរទេស ដែលទោសនេះអាចឱ្យលោកជាប់ពន្ធនាគារ ១០ឆ្នាំ បើតុលាការរកឃើញទោសកំហុសពិតមែននោះ។ លោក Quennedey គឺជាមន្ត្រីព្រឹទ្ធសភាបារាំងជាន់ខ្ពស់ម្នាក់ មកពីនាយកដ្ឋានស្ថាបត្យកម្ម បេតិភណ្ឌ និងសួនច្បារ ហើយមិនតែប៉ុណ្ណោះ លោកក៏ជាប្រធានសមាគមទំនាក់ទំនងបារាំង-កូរ៉េផងដែរ។
បន្ថែមពីលើនេះបើតាមប្រព័ន្ធផ្សព្វផ្សាយបារាំង លោក Quennedey បានធ្វើដំណើរទៅកាន់ប្រទេសកូរ៉េខាងជើងជាច្រើនលើក ក្នុងរយៈពេលប៉ុន្មានឆ្នាំចុងក្រោយនេះ ហើយថែមទាំងបានជួបជាមួយក្រុមមន្ត្រីកូរ៉េខាងជើងជាច្រើនរូប ស្របពេលអាជ្ញាធរបាន តាមស៊ើបអង្កេតលើរូបលោកកាលពីជាងមួយឆ្នាំមុនមកម្ល៉េះ។
គួរបញ្ជាក់ថា លោក Quennedey ត្រូវបានប៉ូលិសបារាំងចាប់ខ្លួនក្នុងទីក្រុងប៉ារីស កាលពីថ្ងៃអាទិត្យកន្លងទៅ និងត្រូវបានសួរចម្លើយអស់រយៈពេល ៩៦ម៉ោង៕
Comments