ថៃបន្ដផ្សព្វផ្សាយផលិតផលតាមរយៈការតាំងពិព័រណ៍ «Best Buy 2019» រយៈពេល៤ថ្ងៃនៅកម្ពុជា

(ភ្នំពេញ)៖ បន្ទាប់ពីទទួលបានការគាំទ្រច្រើនពីអតិថិជនកម្ពុជា ថៃគ្រោងនឹងបន្ដផ្សព្វផ្សាយផលិតផលរបស់ខ្លួនបន្ថែមទៀត តាមរយៈការតាំងពិព័រណ៍ «Best Buy 2019» រយៈពេល៤ថ្ងៃ ចាប់ពីថ្ងៃទី២៨ ខែកុម្ភៈ ដល់ថ្ងៃទី៣ ខែមីនា ឆ្នាំ២០១៩ខាងមុខនេះ។

ពិព័រណ៍ «Best Buy 2019» ត្រូវបានរៀបចំឡើងដោយក្រុមហ៊ុន Victory Provider មកពីប្រទេសថៃ ដោយក្នុងនោះនឹងមានផលិតផលជាច្រើនមកតាំងបង្ហាញដូចជា៖ ស្បែកជើង, សម្លៀកបំពាក់, គ្រឿងអលង្ការ, អាហារ, សំភារៈតុបតែងផ្ទះ, គ្រឿងទេស និងផលិតផលជាច្រើនទៀត។

ថ្លែងក្នុងសន្និសីទសារព័ត៌មានស្ដីពី «ការតាំងពិព័រណ៍ផលិតផលបញ្ចុះតម្លៃធំបំផុតប្រចាំឆ្នាំ» លោក Sutas Thanasiripreeda អ្នករៀបចំការតាំងពិព័រណ៍នេះឲ្យដឹងថា ពិព័រណ៍នេះនឹងមានផលិតផលផ្សេងៗ ដែលក្នុងនោះ៨០ភាគរយ ផលិតផលមកពីប្រទេសថៃ និងប្រមាណ២០ភាគរយទៀត ជាផលិតផលមកពីប្រទេសជប៉ុន, កូរ៉េ និងប្រទេសចិនជាដើម។

លោកបន្ដថា ក្នុងនោះមានទំនិញប្រមាណជាង២០០មុខ ដែលនឹងត្រូវតាំងបង្ហាញ ហើយក្នុងនោះក៏មានការបញ្ចុះតម្លៃពី១០-២០ភាគរយផងដែរ។ លោកថា ក្នុងពិព័រណ៍នេះផងដែររំពឹងថា នឹងមានអ្នកចូលរួមប្រមាណ២ម៉ឺនក្នុងរយៈពេល៤ថ្ងៃ។

លោក Thanwat Maneekornjongsiri មកពីក្រុមហ៊ុន Victory Provider ឲ្យដឹងថា នេះជាលើកទី៤ ដែលក្រុមហ៊ុនបានរៀបចំពិព័រណ៍នេះនៅកម្ពុជា ហើយកាលពីពិព័រណ៍ឆ្នាំទៅ ក្រុមហ៊ុនទទួលបានថវិកាប្រមាណ១លានដុល្លារ ហើយឆ្នាំនេះក៏រំពឹងថា នឹងទទួលបានទឹកប្រាក់ប្រហាក់ប្រហែលនឹងឆ្នាំមុនដែរ។

លោកបន្ដថា ពិព័រណ៍នេះពិតជាពិសេសសម្រាប់អ្នករកស៊ីនៅកម្ពុជា-ថៃ ក្នុងការសហការគ្នាជាដៃគូរពាណិជ្ជកម្ម ហើយក៏ល្អសម្រាប់ប្រជាពលរដ្ឋក្នុងការទិញ ផលិតផលថៃសុទ្ធផងដែរ៕