លោក សម រង្ស៊ី ធ្លាប់ប្រកាសថា ចិនជាសម្ព័ន្ធមិត្តរបស់ខ្លួន ហើយវាយប្រហារអាមេរិក ពេលទស្សនកិច្ចនៅប្រទេសចិន

(ភ្នំពេញ)៖ ទណ្ឌិត សម រង្ស៊ី ដែលប្រជាជនខ្មែរហៅថាជាមនុស្សក្បត់ជាតិ និងបំផ្លាញសេដ្ឋកិច្ចកម្ពុជា និងជាបុគ្គលប្រឆាំងមហាអំណាចចិនផងដែរនោះ, ការពិតលោក សម រង្ស៊ី ធ្លាប់បានប្រកាសតាមរយៈសារព័ត៌មានរបស់ចិនថា អតីតគណបក្សសង្គ្រោះជាតិ (CNRP) ជាសម្ព័ន្ធមិត្តរបស់ប្រទេសចិន ហើយរូបលោកផ្ទាល់ក៏បានប្រកាសគាំទ្រយ៉ាងពេញទំហឹង ទៅលើជម្លោះដណ្ដើមកោះនៅសមុទ្រចិនខាងត្បូង រវាងចិន និងប្រទេសសមាជិកមួយចំនួន​​ នៅក្នុងអាស៊ានទៀតផង។

ជំហររបស់ទណ្ឌិត សម រង្ស៊ី ចងជាសម្ព័ន្ធភាពជាមួយចិន ខណៈដែលលោកបានផ្ដល់កិច្ចសម្ភាសន៍ផ្ដាច់មុខ ជាមួយទូរទស្សន៍ចិនមួយ ដែលមានឈ្មោះថា China Phoenix កាលពីថ្ងៃទី១០ ខែកុម្ភៈ ឆ្នាំ២០១៤កន្លងទៅ។

តាមរយៈកិច្ចសម្ភាសន៍ជាមួយទូរទស្សន៍ចិន លោក សម រង្ស៊ី បាននិយាយដោយច្បាស់ៗរិះគន់មហាអំណាចពួកខាងលិច ជាពិសេសគឺសហរដ្ឋអាមេរិកតែម្តង មិនដែលផ្ដល់លុយ សូម្បីតែមួយដុល្លារ​ គឺគាំទ្រតែបញ្ហាស្មារតីប៉ុណ្ណោះ ហើយក៏បានប្រកាសថា មិនធ្លាប់មានទំនាក់ទំនងជាមួយអាមេរិក ក៏ព្រោះតែអាមេរិកបានគាំទ្រវៀតណាម។

នៅក្នុងកិច្ចសម្ភាសន៍ លោក សម រង្ស៊ី បានបញ្ជាក់យ៉ាងច្បាស់ៗដូច្នេះថា «យើងមិនដែលទទួលបានលុយសូម្បីតែមួយដុល្លារពីមហាអំណាចខាងលិច។ ពួកគេគាំទ្រយើងផ្នែកបញ្ញាស្មារតីប៉ុណ្ណោះ។ តែក៏មានប្រជាជនចិនគាំទ្រយើងដែរ។ ជាការពិតគណបក្សសង្រ្គោះជាតិគឺជាសម្ព័ន្ធមិត្តចិន។ ជាក់ស្តែងគណបក្សសង្រ្គោះជាតិ គាំទ្រចិនយ៉ាងពេញទំហឹងលើការទាមទារកោះស៊ីនសា (កោះប៉ារ៉ាសែល) និងកោះណាន់សា (កោះស្ព្រាតលី) នៅសមុទ្រចិនខាងត្បូង។ នេះវាបង្ហាញថាយើងមិនមានទំនាក់ទំនងនឹងអាមេរិកទេ។ ពីព្រោះថា អាមេរិកគាំទ្រវៀតណាម។ ផ្ទុយទៅវិញ គណបក្សប្រជាជន របស់លោក ហ៊ុន សែន ស្តាប់ និងដើរតាមខ្សែញាក់វៀតណាម។ ដូច្នេះបានជាពួកគេ (CPP) មិនគាំទ្រចិន ដូចគណបក្សសង្រ្គោះជាតិទេ»។

តាមរយៈខ្លឹមសារកាលពី៥ឆ្នាំមុននេះ (២០១៤) អាចជាសារនយោបាយដ៏សំខាន់មួយ បញ្ញាក់ដល់អ្នកគាំទ្រលោក សម រង្ស៊ី និងគណបក្សប្រឆាំងទាំងអស់ឲ្យយល់ និងស៊ីជម្រៅពីនយោបាយ ក្រឡិចក្រឡុច និងគ្មានទិសដៅច្បាស់លាស់ចំពោះមេដឹកនាំរ​បស់ខ្លួន ម្ដងប្រកាសគាំទ្រចិន និងម្ដងប្រកាសគាំទ្រអាមេរិក ដែលអាចហៅឲ្យចំថា ជាអ្នកនយោបាយគ្មានភាពប្រាកដនិយម។

ចុងក្រោយនេះដោយមើលឃើញប្រទេសចិន បានគាំទ្រ និងជួយមកកម្ពុជាយ៉ាងច្រើន និងជាបន្ដបន្ទាប់ លោក សម រង្ស៊ី ក៏ចាប់ផ្តើមបើកការវាយប្រហារទៅលើចិន ហើយគាំទ្រអាមេរិកវិញ ដែលទាំងនេះបង្ហាញយ៉ាងច្បាស់ក្រឡែតថា អ្នកនយោបាយដូច សម រង្ស៊ី មិនមានគោលដៅពិតប្រាកដ និងមិនអាចដឹកនាំប្រទេសជាតិបាននោះឡើយ៕