យានអវកាសអ៊ីស្រាអែលចូលទៅក្នុងគន្លងក្បែរព្រះច័ន្ទដោយជោគជ័យ និងកំពុងត្រៀមចុះចតនៅសប្តាហ៍ក្រោយ

(តែលអាវីវ)៖ យានអវកាសអ៊ីស្រាអែល Beresheet ដែលមានន័យជាភាសាអង់គ្លេសថា Genesis ឬក៏ Origin (ប្រភពដើម) ទីបំផុតត្រូវបានក្រុមការងារនៃបេសកកម្មនេះ បញ្ជាឲ្យទៅដល់ក្នុងគន្លងក្បែរព្រះច័ន្ទដោយជោគជ័យ។ នេះបើតាមការដកស្រង់ ការផ្សាយចេញពីសារព័ត៌មានរុស្ស៊ី Sputnik នៅព្រឹកថ្ងៃសៅរ៍ ទី០៦ ខែមេសា ឆ្នាំ២០១៩។

ផ្ទុយទៅវិញប្រសិនបើការចូលទៅក្នុងគន្លងក្បែរព្រះច័ន្ទ មិនបានទទួលជោគជ័យទេនោះ គឺមានន័យថា បេសកកម្មអវកាសមួយនេះរបស់អ៊ីស្រាអែលបានបរាជ័យតែម្តង ព្រោះថាយាន Beresheet អាចនឹងត្រូវទំនាញរបស់ព្រះអាទិត្យស្រូបទាញយកទៅ។ យ៉ាងណាមិញ ក្រោយពីសម្រេចជោគជ័យហើយ ក្នុងអំឡុងសប្តាហ៍នេះ យាន Beresheet នឹងធ្វើការក្រឡឹងជុំវិញឋានព្រះច័ន្ទដោយសសៀរសន្សឹមៗទៅកាន់តែកៀក ដើម្បីត្រៀមលក្ខណៈសម្រាប់ការព្យាយាមចុះចតនៅថ្ងៃទី១១ ខែមេសា សប្តាហ៍ក្រោយ។

គួរជម្រាបថា នៅពេលដែលយាន Beresheet ចុះទៅជាន់ដល់ដីនៃផ្ទៃព្រះច័ន្ទ អ៊ីស្រាអែលនឹងក្លាយជាប្រទេសទី៤ហើយ ដែលបានធ្វើបែបនេះ បន្ទាប់ពីសហភាពសូវៀត (រុស្ស៊ី) សហរដ្ឋអាមេរិក និងចិន៕