ក្រសួងធនធានទឹក៖ បាតុភូត អែល នីណូ ដែលមានឥទ្ធិពលខ្លាំងមកលើកម្ពុជា បានចុះថមថយឥទ្ធិពលជាលំដាប់នៅដើមរដូវវស្សានេះ

(ភ្នំពេញ)៖ ក្រសួងធនធានទឹក និងឧតុនិយមនៅថ្ងៃទី២០ ខែមិថុនា ឆ្នាំ២០១៩នេះ បានបញ្ជាក់ឲ្យដឹងថា បាតុភូត អែល នីណូ (El Nino) ដែលមានឥទ្ធិពលខ្លាំងមកលើកម្ពុជា និងតំបន់អាងទន្លេមេគង្គ កាលពីក្នុងរដូវប្រាំងកន្លងមកនោះ បានចុះថមថយឥទ្ធិពលជាលំដាប់ នៅដើមរដូវវស្សានេះ។

តាមសេចក្ដីជូនដំណឹងរបស់ក្រសួងធនធានទឹក ដែលបណ្ដាញព័ត៌មាន Fresh News ទទួលបាននៅថ្ងៃនេះ បានឲ្យដឹងថា បន្ទាប់ពីបានធ្វើការតាមដាន ព្យាករណ៍លើស្ថានភាពអាកាសធាតុ និងស្ថានភាពទឹកជំនន់ ទន្លេមេគង្គរួចមក ក្រសួងធនធានទឹក សូមជម្រាបជូនអំពីការព្យាករកម្ពស់ទឹកជំនន់ រដូវវស្សាលើកទី ១ ប្រចាំឆ្នាំ ២០១៩ ដូចខាងក្រោម៖

* ទី១ ៖ ស្ថានភាពទូទៅនៃអាកាសធាតុក្នុងតំបន់៖

* យោងតាមការសង្កេត និងពិនិត្យទៅលើបាតុភូតធម្មជាតិ ពិសេសបាតុភូតដែលមានឈ្មោះថា EL NINO Monitoring Outlook ( ដែលជាបាតុភូតសំខាន់ជាងគេ ក្នុងការកំណត់លក្ខខណ្ឌអាកាសធាតុ ) រួចមកឃើញថា ៖ បាតុភូត អែល នីណូ (El Nino) ដែលមានឥទ្ធិពលខ្លាំងមកលើកម្ពុជា និងតំបន់អាងទន្លេមេគង្គ កាលពីក្នុងរដូវប្រាំងកន្លងមកនោះ បានចុះថមថយឥទ្ធិពលជាលំដាប់នៅដើមរដូវវស្សានេះ ។

ទន្ទឹមនឹងនោះដែរ ខ្យល់មូសុងនិរតី ប្រព័ន្ធសម្ពាធទាប សម្ពាធទាប ...ក៏បាន និងកំពុងកើតឡើង និងបង្កើនឥទ្ធិពលជាបន្តបន្ទាប់។ ស្ថានភាពបែបនេះ នឹងធ្វើឲ្យភ្លៀងអាចមានក្នុងកម្រិតពីមធ្យមទៅច្រើន ទាំងនៅក្នុងអាងទន្លេមេគង្គ ទាំងនៅក្នុងប្រទេសកម្ពុជា។

* ទី២៖ ស្ថានភាពទឹកទន្លេមេគង្គលើ នៅប្រទេសឡាវ និងប្រទេសថៃ មានស្ថានភាព៖

* ស្ថានភាពទឹកទន្លេមេគង្គលើ នៅប្រទេសឡាវ និងប្រទេសថៃ មានស្ថានភាព៖ ចាប់ពីខែមករា ដល់ខែឧសភា ឆ្នាំ ២០១៩ ទឹកមានកម្ពស់ ខ្ពស់ជាងមធ្យមភាគ ច្រើនឆ្នាំ១,០០ម៉ែត្រ នៅប៉ាក់សេ និង១,៥០ម៉ែត្រ នៅវៀងច័ន្ទ ប្រទេសឡាវ។ មកដល់ដើមខែមិថុនា ឆ្នាំ២០១៩ កម្ពស់ទឹក បានថយមកនៅប្រហាក់ប្រហែល នឹងមធ្យមភាគច្រើនឆ្នាំវិញ ។

* ទី៣៖ ស្ថានភាពទឹកទន្លេមេគង្គ ទន្លេបាសាក់ និងទន្លេសាប៖

* ស្ថានភាពទឹកទន្លេមេគង្គក្នុងឆ្នាំ២០១៩ នេះ មានកម្រិតខ្ពស់ជាងមធ្យមភាគច្រើនឆ្នាំ ក្នុងនោះមាន៖ ទន្លេមេគង្គលើ រួមមានខេត្តស្ទឹងត្រែង ក្រចេះ និងខេត្តកំពង់ចាម ពីខែមករា ដល់ខែឧសភា ទឹកមានកម្រិតកម្ពស់ ខ្ពស់ជាងមធ្យមភាគច្រើនឆ្នាំ ពី១,០៧ម៉ែត្រ ទៅ២,១៦ម៉ែត្រ។ មកដល់ខែមិថុនា កម្ពស់ទឹកមានសភាពទាបជាងមធ្យមភាគបន្តិចវិញ។
* ទន្លេមេគង្គក្រោម ទន្លេបាសាក់ និងទន្លេសាប ទឹកមានកម្រិតកម្ពស់ប្រហាក់ប្រហែលនឹងមធ្យមភាគច្រើនឆ្នាំ។
* ទឹកក្នុងបឹងទន្លេសាប មានសភាពទាបជាងមធ្យមភាគច្រើនឆ្នាំ ។

* ទី៤៖ ការព្យាករទឹកជំនន់លើកទី១ ប្រចាំឆ្នាំ២០១៩៖
* យោងលើស្ថានភាពទឹកទន្លេមេគង្គ នាពេលបច្ចុប្បន្ន កត្តាអាកាសធាតុ និងការវិភាគ លើទំនាក់ទំនងរវាងកម្ពស់ទឹកអប្បបរមា និងអតិបរមា ព្រមទាំងការវិភាគលើវដ្តទឹក ការព្យាករលើកទី១ បានបង្ហាញថា នៅស្ថានីយជលសាស្ត្របាសាក់-ចតុមុខ នាឆ្នាំ២០១៩នេះ ទឹកអាចនឹងមានកម្ពស់៩,៣០ម៉ែត្រ ដែលចាត់ទុកជាប្រភេទជំនន់មធ្យម៕

ខាងក្រោមនេះ ជាសេចក្ដីជូនដំណឹង របស់ក្រសួងធនធានទឹក៖