ចំពោះមុខការគំរាមកំហែងពីកូរ៉េខាងជើង ចិន និងរុស្ស៊ី ជប៉ុនបង្កើនកញ្ចប់ថវិកាជាតិ ដើម្បីទិញសព្វាអាវុធពីអាមេរិក

(តូក្យូ)៖ ក្រសួងការពារជាតិជប៉ុននៅថ្ងៃសុក្រនេះ បានដាក់សំណើសុំថវិកាជាតិប្រមាណ ៥០.៣ពាន់លានដុល្លារអាមេរិក ដើម្បីជួយដល់ការបញ្ជាទិញយន្តហោះចម្បាំង និងប្រព័ន្ធការពារមីស៊ីលបន្ថែមទៀត ខណៈដែលប្រទេសអាស៊ីខាងកើតមួយនេះ ចាត់ទុកការគំរាមកំហែងពីកូរ៉េខាងជើង រុស្ស៊ី និងចិន បាននិងកំពុងកើនឡើងខ្លាំង។ នេះបើតាម ការចេញផ្សាយដោយសារព័ត៌មាន CNA នារសៀលថ្ងៃសុក្រ ទី៣០ ខែសីហា ឆ្នាំ២០១៩។

សំណើកញ្ចប់ថវិកា ៥.៣២ពាន់ពាន់លានយ៉េន ឬស្មើនឹង ៥០.៣ពាន់លានដុល្លារអាមេរិកនេះ គឺជាចំនួនដែលមានការកើនឡើង ១.២ភាគរយ បើធៀបនឹងពេលដូចគ្នាកាលពីឆ្នាំ២០១៨ ហើយវាក៏ជាការកើនឡើងជាលំដាប់ក្នុងរយៈពេល ០៨ឆ្នាំជាប់ៗគ្នាផងដែរ។ ការបង្កើនថវិកា លើវិស័យការពារជាតិនេះ គឺដោយសារជប៉ុននឹងត្រូវចំណាយទិញកញ្ចប់សព្វាវុធថ្លៃៗដូចជា យន្តហោះចម្បាំង F35-B ដែលអាចហោះឡើងជាលក្ខណៈបញ្ឈរចំនួន ០៨គ្រឿង ក៏ដូចជាការអភិវឌ្ឍបន្ថែមលើនាវាពិឃាដពីរគ្រឿងដែលខ្លួនមានស្រាប់ ដើម្បីអាចឲ្យយន្តហោះ F35-B ចុះចតបានជាដើម។






បន្ថែមពីខាងលើនេះទៀត ជប៉ុនក៏នឹងត្រូវបញ្ជាទិញប្រព័ន្ធការពារមីស៊ីល អេជីស អាហ្ស័រ (Aegis Ashore) និងការអភិវឌ្ឍបន្ថែមទៀត នូវយន្តហោះចម្បាំងស៊េរីក្រោយៗផងដែរ ហើយដែលគំរោងទាំងអស់ខាងលើនេះ សុទ្ធតែចំណាយលុយទិញពីសហរដ្ឋអាមេរិក។ បច្ចុប្បន្នបញ្ហាមីស៊ីល-នុយក្លេអ៊ែររបស់កូរ៉េខាងជើង គឺជាក្តីកង្វល់ធំបំផុតរបស់ជប៉ុន ខណៈការបង្កើនសកម្មភាពរបស់យោធាចិន និងរុស្ស៊ីនៅលើដែនសមុទ្រជុំវិញនោះ ក៏ជប៉ុនមិនអាចមើលរំលងនោះដែរ៕