បើអ៊ីស្រាអែលទ្រាំទៀតលែងបាននោះ សង្គ្រាមជាមួយតំបន់ Gaza នឹងផ្ទុះឡើង!

(ហ្សេរុយសាឡឹម)៖ នាយករដ្ឋមន្រ្តីអ៊ីស្រាអែលលោក ប៊ិនចាមីន ណឺតាន់យ៉ាហ៊ូ (Benjamin Netanyahu) នាថ្ងៃព្រហស្បតិ៍នេះបាននិយាយថា អ៊ីស្រាអែលប្រហែលគ្មានជម្រើសអ្វីផ្សេង ក្រៅតែពីធ្វើសង្រ្គាមនៅតំបន់ហ្គាហ្សា (Gaza) នោះឡើយ ដើម្បីបញ្ចប់ការបាញ់ផ្លោងមីស៊ីល ចូលមកតំបន់ភាគខាងត្បូងរបស់ខ្លួន។ នេះបើតាមការដកស្រង់ការផ្សាយចេញពី ទីភ្នាក់ងារព័ត៌មានចិនស៊ីនហួរ នៅរសៀលថ្ងៃព្រហស្បតិ៍ ទី១២ ខែកញ្ញា ឆ្នាំ២០១៩។

លោក Netanyahu បានលើកឡើងដូច្នេះថា «សង្រ្គាមនឹងក្លាយជាជម្រើសចុងក្រោយ» ប៉ុន្តែលោកបានបញ្ជាក់ថា អ៊ីស្រាអែលប្រហែលមិនមានជម្រើសផ្សេងឡើយ ក្រៅពីការបើកយុទ្ធនាការយោធាទ្រង់ទ្រាយធំ ពោលគឺធ្វើសង្រ្គាមប្រឆាំងនឹងកងកម្លាំងនៅឯតំបន់ហ្គាហ្សា។

គួរជម្រាបថា ការបាញ់ផ្លោងគ្រាប់រ៉ុក្កែតនាពេលថ្មីកន្លងទៅនេះ រួមមានទាំងរ៉ុក្កែត ០២គ្រាប់ ដែលឆ្លងចូលទីក្រុង អាហ៍ដូដ (Ashdod) នៅភាគខាងត្បូងអ៊ីស្រាអែល ស្របពេលដែលលោក Netanyahu ស្ថិតនៅទីនោះ គឺជាស្នាដៃរបស់ក្រុមសកម្មប្រយុទ្ធ ដែលមិនមានជាប់ពាក់ព័ន្ធជាមួយក្រុមសកម្មប្រយុទ្ធហាម៉ាស់ (Hamas) ដែលជាអ្នកគ្រប់គ្រងតំបន់ហ្គាហ្សាឡើយ។

ទោះជាបែបនេះក្តី លោក Netanyahu បាននិយាយថា វាគឺជាការទទួលខុសត្រូវរបស់ក្រុម Hamas ហើយលោកបានប្តេជ្ញាថានឹងកម្ទេចក្រុមនេះឲ្យបាន ដើម្បីបញ្ចប់ការគំរាមកំហែង នៃការវាយប្រហារដោយគ្រាប់រ៉ុក្កែតថែមទៀត មកលើទឹកដីរបស់អ៊ីស្រាអែល៕