ហុងគ្រីព្រមានប្រើយោធាទប់ទល់ស្ថានការណ៍ បើសិនជាតួកគីបើកច្រកផ្លូវឲ្យជនភៀសខ្លួនស៊ីរី ចូលមកកាន់ទ្វីបអឺរ៉ុប

(ហុងគ្រី)៖ នាយករដ្ឋមន្ត្រីហុងគ្រី លោក វីកទ័រ អ័របេន (Viktor Orban) បានព្រមានថា ប្រទេសរបស់លោកនឹងប្រើប្រាស់កម្លាំងយោធា នៅឯតំបន់ព្រំដែនភាគខាងត្បូង ដើម្បីការពារតំបន់ព្រំដែនអឺរ៉ុប បើសិនជាតួកគីបើកច្រកផ្លូវសម្រាប់ជនភៀសខ្លួន ចូលមកកាន់តំបន់នេះ។ នេះបើតាមការចេញផ្សាយដោយសារព័ត៌មាន Sputnik នៅរសៀលថ្ងៃព្រហស្បតិ៍ ទី១៧ ខែតុលា ឆ្នាំ២០១៩។

លោក Viktor Orban ធ្វើការព្រមានដូចខាងលើ នៅក្នុងបទសម្ភាសន៍មួយនាពេលថ្មីៗនេះ ខណៈមានសេចក្ដីរាយការណ៍ថា តួកគីអាចនឹងបញ្ជូនជនភៀសខ្លួនស៊ីរីរាប់លាននាក់ ទៅកាន់សហភាពអឺរ៉ុប នៅក្នុងករណីទីក្រុងជាប់ទណ្ឌកម្មដោយសារតែប្រតិបត្តិការយោធា កម្ទេចក្រុមសកម្មប្រយុទ្ធឃើដនៅតំបន់ភាគខាងជើងប្រទេសស៊ីរី។ លោក Orban បានគូសបញ្ជាក់ដូច្នេះថា «បើសិនជាតួកគីបើកច្រកផ្លូវ ឬបញ្ជូនជនភៀសខ្លួនមកកាន់អឺរ៉ុប នោះយើងចាំបាច់ត្រូវតែ ប្រើកម្លាំងបាយដើម្បីការពារព្រំដែនហុងគ្រី និងព្រំដែនរវាងហុងគ្រី និងស៊ែប៊ី...»។

គួរបញ្ជាក់ថា បើតាមលោកនាយករដ្ឋមន្ត្រីហុងគ្រី Viktor Orban បច្ចុប្បន្នមានជនភៀសខ្លួន ៩០,០០០នាក់ នៅក្នុងតំបន់បាល់កង់ ហើយចំនួនអាចនឹងកើនឡើងដល់ ១០០,០០០នាក់។ លោក Orban គឺជាអ្នកនយោបាយម្នាក់ ដែលប្រឆាំងជំទាស់យ៉ាងខ្លាំងនឹងជនអន្តោប្រវេសន៍ ព្រោះវាបានបង្កឲ្យប្រទេសអឺរ៉ុបជាច្រើនរួចមកហើយ ជួបប្រទះបញ្ហាសន្តិសុខ ជាពិសេសគឺអំពើភេរវកម្មតែម្តង៕