ការបាញ់ផ្លោងដាក់គ្នារវាងអ៊ីស្រាអែល និងហ្គាស្សាផ្តាច់ជីវិតមនុស្សកើនដល់១៥នាក់!

(ហ្គាហ្សា)៖ ជនជាតិប៉ាឡេស្ទីនចំនួន ០៣នាក់បន្ថែមទៀតបានបាត់បង់ជីវិតនៅថ្ងៃពុធនេះ នៅក្នុងវាយប្រហារតាមផ្លូវអាកាសរបស់អ៊ីស្រាអែល ទៅលើតំបន់ហ្គាហ្សាស្ទ្រីព (Gaza Strip) ដែលជាហេតុធ្វើឲ្យចំនួនមនុស្សស្លាប់សរុប នៅក្នុងការបាញ់ផ្លោងដាក់គ្នា គិតចាប់តាំងពីថ្ងៃអង្គារម្សិលមិញនេះ កើនដល់ចំនួន ១៥នាក់។ នេះបើតាមការចេញផ្សាយដោយ ទីភ្នាក់ងារព័ត៌មានចិនស៊ីនហួរ នាល្ងាចថ្ងៃពុធ ទី១៣ ខែវិច្ឆិកា ឆ្នាំ២០១៩។

ក្រសួងសុខាភិបាលហ្គាហ្សាបានថ្លែងប្រាប់ ទៅកាន់ក្រុមអ្នកសារព័ត៌មាននានាថា យុវជនវ័យក្មេងប៉ាឡេស្ទីនចំនួន ០៣នាក់បានបាត់បង់ជីវិតនៅក្នុងមន្ទីរពេទ្យ បន្ទាប់ពីគ្រាប់ផ្លោងរបស់អ៊ីស្រាអែល ធ្លាក់ចំទីកន្លែងដែលពួកគេស្ថិតនៅតែម្តង នៅតំបន់ភាគកណ្តាលទីក្រុងហ្គាហ្សា កាលពីពេលព្រឹកថ្ងៃពុធនេះ។

គួរបញ្ជាក់ថា ជម្លោះរវាងក្រុមហាម៉ាស់-ប៉ាឡេស្ទីននៅតំបន់ហ្គាហ្សា និងប្រទេសអ៊ីស្រាអែល បានអូសបន្លាយពីរថ្ងៃមកហើយ បន្ទាប់ពីប្រតិបត្តិការវាយប្រហារតាមផ្លូវអាកាស របស់អ៊ីស្រាអែលបានផ្តាច់ជីវិត មេបញ្ជាការជាន់ខ្ពស់ម្នាក់របស់ក្រុម Hamas ឈ្មោះ បាហា អាប៊ូ អាល់អាតថា (Baha Abu Al-Atta) នៅតំបន់ Gaza Strip។ ប្រការនេះបានបណ្តាលឲ្យមានការវាយប្រហារសងសឹក ដោយគ្រាប់រ៉ុក្កែតពីសំណាក់ក្រុម Hamas៕