តួកគីបើកប្រតិបត្តិការផ្តាច់ជីវិតកងទ័ពស៊ីរី «៣០នាក់» ជាការសងសឹកឲ្យកងទ័ពតួកគី «៤នាក់» ដែលត្រូវបានសម្លាប់នៅខេត្ត Idlib

(អ៊ីស្តង់បុល)៖ ប្រធានាធិបតីតួកគីលោក តាយីព អឺដូហ្គាន់ (Tayyip Erdogan) បានថ្លែងនៅថ្ងៃចន្ទនេះថា កងទ័ពតួកគីបានបើកប្រតិបត្តិការសងសឹក និងផ្តាច់ជីវិតកងទ័ពស៊ីរីសរុប ៣០នាក់ ក្រោយស៊ីរីធ្វើការវាយប្រហារលើកងទ័ពតួកគី នៅក្នុងខេត្តអ៊ីដលីប (Idlib) ដែលបានបណ្តាលឲ្យកងទ័ពតួកគី ០៤នាក់ស្លាប់។ នេះបើតាមការចេញផ្សាយដោយ ទីភ្នាក់ងារព័ត៌មានចិនស៊ីនហួរ នាល្ងាចថ្ងៃចន្ទ ទី០៣ ខែកុម្ភៈ ឆ្នាំ២០២០។

ប្រធានាធិបតីតួកគីលោក Erdogan បានគូសបញ្ជាក់យ៉ាងដូច្នេះថា «កាំភ្លើងធំ និង F-16 (យន្តហោះចម្បាំង) របស់យើង គឺកំពុងតែធ្វើប្រតិបត្តិការនៅទីនោះ។ ទាហានរបស់យើងបានបាត់បង់ជីវិត យើងមិនអាចអង្គុយនៅស្ងៀមបាននោះទេ...។» បើតាមការអះអាងរបស់តួកគី ទីតាំងយោធាស៊ីរីប្រមាណ ៤០កន្លែង ត្រូវបានវាយប្រហារ ហើយក្នុងនោះទាហានស៊ីរីយ៉ាងហោចណាស់ក៏ ៣០នាក់ដែរបានបាត់បង់ជីវិត។

លោកប្រធានាធិបតីតួកគីក៏បានសង្កត់ធ្ងន់ផងដែរថា នៅក្នុងជម្លោះនេះ គឺជាជម្លោះរវាងតួកគី និងស៊ីរីប៉ុណ្ណោះ ដោយតួកគីមិនមានការបង្កជម្លោះណាមួយ ជាមួយរុស្ស៊ីនោះឡើយ។ គួរបញ្ជាក់ថា កងទ័ពតួកគីសរុប ០៤នាក់ បានស្លាប់ និង ០៩នាក់ផ្សេងទៀតរងរបួស នៅក្នុងការផ្លោងគ្រាប់កាំភ្លើងធំដោយកងទ័ពរដ្ឋាភិបាលស៊ីរី នៅក្នុងខេត្ត Idlib របស់ស៊ីរីដែលជាប់ព្រំដែនតួកគី៕