កាសែតអាមេរិក៖ «ក្នុងពេលដែលគ្រប់គ្នាកំពុងត្រូវការ WHO បំផុត អាមេរិកបែរជាបោះបង់អង្គការនេះចោល»

(ញូយ៉ក)៖ អត្ថបទវិភាគមួយរបស់កាសែត New York Times បានលើកឡើងថា អង្គការសុខភាពពិភពលោក WHO នៅតែជា «ក្តីសង្ឈឹមល្អបំផុតរបស់ពិភពលោក» ក្នុងការប្រយុទ្ធប្រឆាំងនឹងជំងឺរាតត្បាតសកល។ នេះបើតាមការចុះផ្សាយដោយ ទីភ្នាក់ងារព័ត៌មានស៊ីនហួរ នារសៀលថ្ងៃអង្គារ ទី១៦ ខែមិថុនា ឆ្នាំ២០២០។ 

ក្រោមអត្ថបទមួយដែលមានចំណងជើងថា «កុំចាកចេញពី WHO តែត្រូវពង្រឹងអង្គការនេះ» ចុះផ្សាយដោយកាសែត New York Times កាលពីថ្ងៃចុងសប្តាហ៍មុន បានលើកឡើងយ៉ាងដូច្នេះថា «នៅពេលពិភពលោកកំពុងប្រយុទ្ធនឹងជំងឺរាតត្បាត ដ៏ធ្ងន់ធ្ងរបំផុតប្រចាំសតវត្សរ៍នេះ សហរដ្ឋអាមេរិកឯណោះវិញបែរជា កំពុងស្ថិតក្នុងដំណើរការដកខ្លួនចេញពីអង្គការអន្តរជាតិតែមួយគត់ ដែលមានតួនាទីឈានមុខគេ ក្នុងកិច្ចខិតខំប្រឹងប្រែងនេះទៅវិញ»។

អត្ថបទដដែលនេះបានបន្តថា ការដកខ្លួនចេញរបស់សហរដ្ឋអាមេរិកពីអង្គការសុខាពិភពលោក នឹងធ្វើឲ្យសហរដ្ឋអាមេរិកខ្លួនឯង និងពិភពលោកទាំងមូល កាន់តែស្ថិតក្នុងស្ថានភាពអាក្រក់ឡើង នៅចំពោះជំងឺរាតត្បាតសកល COVID-19។ ជាមួយគ្នានេះកាសែតអាមេរិកមួយនេះ បានសង្កត់ធ្ងន់ទៀតថា «មានតែតាមរយៈអង្គការសុខភាពពិភពលោកប៉ុណ្ណោះ ដែលធ្វើឲ្យអ្នកវិទ្យាសាស្ត្រអាមេរិក អាចធ្វើទស្សនកិច្ចនៅប្រទេសចិន ដើម្បីមើលឃើញពីការឆ្លើយតបរបស់ប្រទេសនេះតាំងពីដំបូងទី»។

គួរជម្រាបថា កាលពីខែឧសភាកន្លងទៅនេះ ប្រធានាធិបតីអាមេរិកលោក ដូណាល់ ត្រាំ បាននិយាយថា ប្រទេសរបស់លោកកំពុង «បញ្ចប់» ទំនាក់ទំនងជាមួយអង្គការសុខភាពពិភពលោក (WHO)។ ការលើកឡើងនេះកើតឡើងតែប៉ុន្មានថ្ងៃប៉ុណ្ណោះ បន្ទាប់ពីសេតវិមានបានផ្ញើលិខិតមួយ ទៅកាន់ប្រមុខដឹកនាំ WHO លោក ថេដ្រូស អាដាណម ហ្គែប្រេយែសឹស (Tedros Adhanom Ghebreyesus) ថា អាមេរិកនឹងផ្អាកជាបណ្តោះអាសន្ននូវការផ្តល់វិភាគទានដល់អង្គការមួយនេះ។ មិនតែប៉ុណ្ណោះមហាអំណាចលេខ ១ លើលោកមួយនេះ ថែមទាំងបានគំរាមដកសមាជិកភាពរបស់ខ្លួន ចេញពីអង្គការមួយនេះទៀតផង ក្រោមហេតុផលថា WHO ធ្វើការមិនបានល្អ និងមាននិន្នាការទៅរកចិន។

បច្ចុប្បន្នសហរដ្ឋអាមេរិក ជាអ្នករងគ្រោះធ្ងន់ជាងគេបំផុតដោយសារតែជំងឺ COVID-19 ជាមួយនិងករណីឆ្លងសរុបជាង ២.១លានករណី ក្នុងនោះស្លាប់ជាង ១១៨ពាន់នាក់ និងជាសះស្បើយឡើងវិញជិត ៨៩០ពាន់នាក់៕